Әуесбаева Пәкизат Теңізбайқызы – М.О. Әуезов атындағы Әдебиет және өнер институтының жетекші ғылыми қызметкері, филология ғылымдарының кандидаты, доцент. 1986 жылы С.М.Киров атындағы Қазақ Мемлекеттік университетінің филология факультеті араб бөлімін үздік бітірген. П.Т. Әуесбаева 1999 жылы «Қазақ фольклорындағы әңгіме жанры» тақырыбында кандидаттық диссертация қорғап, аталмыш тақырыпта (2001) монографиясы жарық көрді. Зерттеуші – текстология саласы бойынша «Қазақ фольклоры текстологиясының кейбір мәселелері» (2004), «Кейбір халық әдебиеті үлгілерінің салыстырмалы текстологиясы» (2007), онтомдық «Қазақ әдебиеті тарихының» 1-томы (2008), «Фольклорлық мұралар: жиналу, жариялану тарихы» (2014), «Қазақ текстологиясы: эпостық жырларды мерзімдеу мәселелері» (2017), «Қолжазба қорларындағы батырлық жырлардың жиналу тарихы» (2017) атты ұжымдық монография авторларының бірі және 17 ғылыми жинақты құрастырушылардың бірі. Грантпен қаржыландырылған 10-нан астам ғылыми жобаларға қатысты, оның ішінде 3 жобаның жетекшісі болды. П.Ауесбаева Б.Б. Городовиков атындағы Қалмақ мемлекеттік университетіндегі «Моңғол халықтарының мәдени мұрасы» халықаралық ғылыми орталығы ұйымдастырып келе жатқан «Еуразия халықтарының ертегілері» атты ғылыми халықаралық жобаға 2017 жылдан бері үзбей қатысып келеді. Нәтижесінде 4 жинақ жарияланды. П. Әуесбаева 2004 жылы «Мәдени мұра» бағдарламасы аясында жарияланған «Бабалар сөзі» жүзтомдығының ғылыми басылымын әзірлеуге араласып, он томын баспаға дайындауда жауапты шығарушы және құрастырушы ретінде қатысты, ғылыми түсініктемелер жазды. Сондай-ақ П. Әуесбаеваның жүзден аса ғылыми мақалалары ұжымдық жинақтарда, отандық және шетелдік басылымдарда (оның ішінде 6 мақала Scopus базасында) жарияланған. 2014-2015 оқу жылынан бастап П.Ауесбаева Әл-Фараби атындағы Қазақ ұлттық университетімен бірлескен жоба аясында «Ғылым ордасы» Жоғары оқу орнынан кейінгі білім беру орталығында фольклортану және текстология салалары бойынша оннан аса пәннен оқу-әдістемелік кешенін дайындап, магистранттар мен докторанттарға дәріс оқиды.